أكتب هذه الكلمات عن هادي حبيش، علّ الكلمات تُنصِف

 

عم أكتب لأول مرة باللغة “الدارجة” حتى كل حدا يفهمني بأسهل لهجة ويكون الكلام قريب من قلوب الكل.. عم أكتب عن هادي حبيش..علّ الكلمات تنصف هالشخص يومًا ما عندما ينصفه التاريخ.

بداية لازم قول إني قبل ما أتعرف على النائب هادي حبيش كنت متل بعص الناس فكّر أنو هالإنسان عندو شوفة حال، متعجرف، متكبّر لكن الحقيقة عكس هيدا الشي تمامًا.. المتل بيقول: “ما بتعرفونا تتعاشرونا”.. وقلو بتعرفو قلو اي .. قلو عاشرتو قلو لأ .. بدك تعاشر الإنسان لتعرف معدنو وهادي حبيش معدنو أصيل وطيّب.. وزعيم حقيقي اكتسب زعامتو من أداءه ونشاطه وجهده.. حقيقة هالإنسان لو أمضّى الأربع سنوات نيابة يرد على الهواتف التي يحملها لنفدت السنوات وما انتهى مكالمات.. ومش بمقدور أي نائب أو مسؤول يزور بيوت كل الناس هيدا المستحيل بذاته، ومع أنو الإنتخابات لسا باقي عليها كتير، لكن حراكو بقلب عكار وقراها بتفكر أنو بكرا في انتخابات نيابية.. وهيدا دليل أنو هالانسان ما بيشتغل متل غيرو قبل الانتخابات وبعدها بيغيب.. وإضافة لهالشي هوي دائمًا بيتو مفتوح وهواتفه مفتوحة ليلبّي الناس اللي انتخبو واللي ما انتخبو .. اللي محسوب عليه والغير محسوب عليه وأنا من الناس اللي خدمني مع أنو بيعرف صوتي التفضيلي ما كان ألو..

وبما أنو ما حدا قادر يرضي كل الناس فمتلو متل غيرو عندو مؤيدين ومعارضين، لكن كل معارض الو عم يرجع يشوفو ويتعرف عليه عن قرب، عم يقول: قديش كنت غلطان لما حكمت على هالشخص من بعيد.

كنت أسمع بعض الناس بتتهم هادي حبيش بالمناطقية والطائفية. قررت أتأكد من هالشي بنفسي زرتو ببيتو عدة مرات كنت كل الوقت حدق بالناس وراقب.. شوف الناس الموجودين ببيتو..للحقيقة في مسلمين ببيتو أكتر من المسيحيين وكمية الخدمات يلي عم يقدما للمسلمين من أبناء عكار توازي أضعاف يمكن اللي عم يقدمو للمسيحيين..

ولا بد من ذكر قضية أساسية. هادي حبيش فعلًا بيشبه اسمو . هادي الأطباع بس شديد الصلابة بمواقفه ودفاعه عن حقوق منطقته، أحيانًا بيتعرّض لإساءات على مواقع التواصل الإجتماعي من أشخاص، ولا مرة رد الإساءة بإساءة متلها.. دايمًا بيرد بشغل وانتاج بيخلي اللي انتقدو يرجع يراجع نفسو ويحس أنو غلّط..

هيدا هوي بكل بساطة هادي حبيش.. شخص سواء بتحبو أو بتكرهو.. بتأيدو أو ما بتأيدو بس ما فيك تنكر بالمرة أنو عندو كاريزما سياسية وزعيم حقيقي ما بيترك ناسو ونائب بتفتخر في أنو بيمثلك وبيمثل منطقتك وطموح أهلها.. ليش؟ لأنو واعي وفهمان وعارف شو بدو وشو بدا منطقتو.. شخص متابع وإذا استلم ملف بينهي بجدارة.. وبعد هالكلام اللي قلتو عن تجربة ويلي ببعرفو تمامًا الأشخاص القراب من هادي حبيش، بتمنى من البعاد عنو يجربو ورح يلاقو كل حرف انكتب كان صحيح وبعدها رح يصير الو بيت بيلجألو بكل لحظة هوي بيت هادي حبيش.. ورح يصير ابن وأخ مرحّب فيه بالبيت العكاري الوطني .. وهوي ساعتها مارح يتأخر ليقول للنائب هادي حبيش: بيتي بيتك يا شيخ الكل.

مايز عبيد

Post Author: morheb

Leave a Reply

Your email address will not be published. Required fields are marked *